mobile

उपराष्ट्रपतिले स्काउट ज्याम्बोरेट उदघाटन गर्नुहुने

By Shreya Pokharel on Oct 12,2017 - 11:53

उपराष्ट्रपति नन्दबहादुर पुनले विराटनगरमा हुने तेस्रो क्षेत्रीय स्काउट ज्याम्बोरेट (भेला)को भोलि असोज २७ गते उद्घाटन गर्नुहुने भएको छ । पूर्व मेचीदेखि पश्चिम महाकालीसम्मका विभिन्न ३५ जिल्लाका करिब तीनहजार ५०० स्काउटर बालबालिकाले असोज २६ देखि ३० गतेसम्मको भेलामा सहभागिता जनाउने बुधबार आयोजित पत्रकार सम्मेलनमा जानकारी दिइयो । 

उक्त ज्याम्बोरेटमा १३ देखि १६ वर्ष उमेर समूहका स्काउटर विद्यार्थी बालबालिकाले सहभागिता जनाउने र त्यसका लागि सबै तयारी पूरा भइसकेको आयोजक समितिका क्षेत्रीय संयोजक शिवकुमार पौडेलले बताउनुभयो । 

विराटनगरस्थित महेन्द्र मोरङ क्याम्पस परिसरमा आयोजना हुने ज्याम्बोरेटमा सहभागी बालबालिकालाई साहसिक, सांस्कृतिक र मनोरञ्जनात्मक कला प्रदर्शन गर्दै राष्ट्रिय एकता मजबुत गरी समाजमा भाइचारा कायम गर्नु ज्याम्बोरेटको मुख्य उद्देश्य रहेको संयोजक पौडेलको भनाइ छ । 

क्याम्पस हातामा ४० वटा बेस—क्याम्प निर्माण गरी स्काउटर बालबालिकालाई आपत् विपत्मा सहयोग गर्ने स्वयंसेवी बन्नका लागि आत्मबल बढाउन सैद्धान्तिक र प्रयोगात्मक ज्ञान दिइने आयोजक सदस्य नवलप्रसाद उपाध्यायले जानकारी गराउनुभयो । 

यसअघि विसं २०५९ मा धरान र २०६९ मा झापाको दमकमा ज्याम्बोरेट सम्पन्न भएको थियो । पाँचदिने उक्त ज्याम्बोरेट सम्पन्न गर्न करिब रु २५ लाख खर्च लाग्ने आयोजक समितिका सदस्य किरण गिरीले बताउनुभयो ।  रासस

SUGGESTED ARTICLES

img
मापदण्ड विपरीत सडक ग्राभेल हुँदा स्थानीयको आपत्ति

मोरङ उर्लाबारी–६ स्थित चन्द्रमा चोकदेखि डिपु मार्गसम्मको सडकमा मापदण्ड विपरीत गरेको ग्राभेलप्रति स्थानीयवासीले आपत्ति जनाएका छन् । उर्लाबारी नगरपालिकाको सहयोग र उपभोक्ताबाट प्रतिफिट रु ३० का दरले रकम उठाएर गरिएको ग्राभेल मापदण्ड विपरीत भएको भन्दै उनीहरुले आपत्ति जनाएका हुन् । चार सय १७ मिटर लम्बाइको सडक ग्राभेलका लागि नगरपालिकाबाट रु तीन लाख विनियोजन भएको थियो ।


by RSS | Jun 24

img