mobile

मतदान गर्न घर फर्किँदै मजदुर

By RSS on Dec 06,2017 - 13:58

काभ्रेपलाञ्चोक बल्थलीबाट भक्तपुरको ताथलीस्थित श्री इँटाभट्टामा काम गर्न आएका रामप्रसाद श्रेष्ठको छ नाको परिवार आज बिहानै घर फर्किएको छ । 

कसलाई भोट दिने भन्नेबारेमा निर्णय लिई नसके पनि मत भने दिनैपर्छ भन्दै काम छाडेर सो परिवार घर फर्किएको हो । भक्तपुरका विभिन्न इँटाभट्टामा काम गर्न आएका मजदुर तीन दिनदेखि मतदान गर्नका लागि घर फर्किरहेकाछन् । 
इँटा व्यवसायी संघका पूर्वअध्यक्ष नवीन प्रजापतिले चुनावका कारण इँटाभट्टामा कामदारको अभाव भएको बताउनुभयो । विगतका वर्षमा यतिखेर इँटा बनाउन शुरु भइसक्नेमा यस वर्ष कतिपय चुनाव सकेपछि काम गर्न आउने भनेर ‘बुक’ भई पहिल्यै नै गएका र काम गरिरहेकाहरु कतिपय मत हाल्न भनेर घर फर्किएकाले मजदुरको समेत अभाव भएको बताउनुभयो । 

निर्वाचनमा मतदाताले उत्साहपूर्ण रुपमा मतदान गरुन् भन्ने उद्देश्यले निर्वाचनपछि आउने भनेकाले तिनलाई व्यवसायीले छुट दिएको प्रजापतिले बताउनुभयो । “मजदुर अभावकै कारण यस वर्ष इँटा उत्पादन ढिला हुनेछ ” उहाँको भनाइ थियो । 

सूर्यविनायक नगरपालिका सिपाडोलमा रहेको इँटाभट्टामा काम गर्ने अधिकांश मजदुर पनि घर फर्किएका छन् । धेरैजसो मजदुर मंगलबारसम्म घर गएका र बाँकी भएकाहरु आज बिहानैदेखि घर जान थालेको व्यवसायीको भनाइ छ । व्यवसायीले समेत मजदुरलाई “यस पटकको मत हाल्नैपर्छ खेर फाल्न हुन्न” भनेर पठाएका छन् । 

सिपाडोलका एक इँटाभट्टामा काम गर्ने सिन्धुलीकी सुन्तली सुनुवारको पाँच जनाको परिवार पनि मत हाल्न घर फर्किएको छ । आज बिहान सूर्यविनायकबाट बस चढ्नुअघि मत हाल्न घर जान लागेको बताउँदै सुनुवारले भन्नुभयो, “गाउँमै रोजगारी दिन्छौँ, भूकम्पले भत्केको घर बनाइदिन्छाँै भनेर उम्मेदवारले भनेकाले भोट हाल्न गाउँ जान लागेका हौँ ”बताउनुभयो । 

इँटाभट्टाबाहेक खेतमा काम गर्न आएका मजदुर मतदाता पनि घर फर्किएका छन् । चाँगुनारायण नगरपालिका– ९ ताथलीका सानुभाइ गिरीले खेतमा काम गर्न आएका मजदुर पनि काम छाडेर मतदान गर्न फर्किएको बताउनुभयो । भक्तपुरमा मजदुर नपाइने भएपछि विभिन्न जिल्लाबाट हरेक वर्ष खेतको काम गर्न मजदुर आउँछन् । “भोट हालेर फर्किन्छौ भन्दै मजदुर घर फर्किएपछि खेत खन्न र गहुँ छर्न पनि ढिला हुन थालेको छ” उहाँको भनाइ छ । 

काठमाडौँ उपत्यका बाहिरबाट आएका भक्तपुर औद्योगिक क्षेत्रभित्रका विभिन्न उद्योगका कामदार पनि मतदानकै लागि गाउँ फर्किएपछि कतिपय उद्योग दुई दिनदेखि बन्द भएको छ । भक्तपुरमा ६२ इँटाभट्टामा स्थानीय र बाहिरका गरी करीब ३० हजार मजदुर कार्यरत छन् । रासस

ट्याग -  आज बिहानै घर फर्किएको छ

SUGGESTED ARTICLES

img
सुकुम्वासी बस्तीमा खानेपानी र सरसफाइ कार्यक्रमको प्रभावकारिता

काठमाडौँ र भक्तपुरका विभिन्न छवटा सुकुम्वासी तथा सोवासी बस्तीमा सञ्चालन गरिएको खानेपानी तथा सरसफाइ कार्यक्रम निकै प्रभावकारी भएको मिनर्जी नामक संस्थाले दाबी गरेको छ । 


by RSS | Today, 12:33 PM

img