mobile

नौ दिनदेखि नगरवासी अन्धकारमा

By RSS on Jun 12,2018 - 12:25

विद्युत्सेवा बन्द भएपछि ताप्लेजुङको फुङलिङ नगरपालिकाका दुईवटा वडा विगत नौ दिनदेखि अन्धकारमय बनेका छन् । फुङलिङ नगरपालिका–१० फुरुम्बुमा रहेको याफ्रे लघु जलविद्युत् आयोजनाको टर्वाइनमा आएको खराबीका कारण विद्युत् सेवा बन्द भएपछि वडा नम्बर १० र ११ (साविकको हाङ्देवा र फुरुम्बु गाविस) अन्धकारमय बनेका हुन् । गएको जेठ २० गतेदेखि टर्वाइनमा आएको खराबीका कारण विद्युत्सेवा बन्द भएको आयोजनाले जनाएको छ । यता लामो समयसम्म विद्युत् सेवा बन्द हुँदा स्थानीय उपभोक्ता भने अन्धकारमा बस्न बाध्य छन् । विद्युत् नहुँदा मट्टितेलको भरमा रहनु परेको स्थानीय विष्णुप्रसाद पोखरेलले बताउनुभयो । महिनामा बल्लतल्ल बीस दिन बत्ती बल्ने गरेकोमा अहिले पूरै बन्द हुँदा समस्या भएको पोखरेलको भनाइ छ । 

आयोजनाको व्यवस्थापनमा हेलचेक्राइँ हुने गरेकाले लामो समयसम्म विद्युत् अवरोध हुँदै आएको स्थानीयको आरोप छ । हाल बिग्रिएको टर्वाइन मर्मतका लागि अझै केही दिन लाग्ने आयोजनाले जनाएको छ । यस्तै उक्त आयोजनाले ल्याब टेष्ट नगरेका साथै कमसल प्रकारका मिटरबक्स जडान गरेकाले उपभोक्ता समस्यामा परेको जनाइएको छ । सामान्य बत्ती बाल्दा पनि धेरै महशुल देखिने, मिटर बक्सबाट ठूलो आवाज आउनेजस्ता समस्या देखिएको स्थानीय घनेन्द्र गुरुङले बताउनुभयो । उहाँका अनुसार आयोजना निर्माणका समयमा भएको इस्टमेटअनुसारका सामान नल्याइएको र कमसल प्रकारका सामान जडान गरिएकाले समेत समस्या भएको छ । विभिन्न ठाउँमा अर्थिङ जडानका लागि उपभोक्तासँग आयोजनाले पैसा उठाएको तर हालसम्म अर्थिङ जडान नहुँदा आफूहरु त्रासमा परेको स्थानीयले बताएका छन् । ९५ किलोवाट क्षमताको उक्त आयोजनाबाट ९४५ घरपरिवारले विद्युत् उपभोग गर्दै आएको बताइएको छ । (रासस) 

ट्याग -  अन्धकार

SUGGESTED ARTICLES

img
एसइईको नतिजा एक साताभित्र

माध्यमिक शिक्षा परीक्षा अर्थात एसइई परीक्षाको नतिजा एक साताभित्र सार्वजनिक हुने भएको छ । परीक्षा नियन्त्रण कार्यालय सानोठिमीले गत चैत दोस्रो साता लिएको परीक्षाको नतिजा सार्वजनिक गर्ने अन्तिम तयारी भइरहेको परीक्षा नियन्त्रण कार्यालयले जनाएको छ । परीक्षा नियन्त्रक अम्बिकाप्रसाद रेग्मीले सबै उत्तर पुस्तिका सम्परीक्षण गरी विद्यार्थीको नम्बर चढाउने र रुजू गर्ने काम भइरहेको जानकारी दिनुभयो ।


by RSS | Jun 18

img