mobile

ताराखोलामा कागज उद्योग

By RSS on Nov 05,2018 - 13:40

ताराखोला गाउँपालिका–५ मा ‘डुडे लेक नेपाली हाते कागज उद्योग’ सञ्चालनमा आएको छ । छ उद्यमीले रु दुई लाखको लगानीमा सो उद्योग खोलेका हुन् ।उद्योगले एक महिनादेखि कागज उत्पादन गर्दै आएको छ । उद्योगका सञ्चालक प्रेमबहादुर रोकाका अनुसार दैनिक चार सय थान कागज उत्पादन भइरहेको छ । बागलुङ उद्योग वाणिज्य सङ्घले उद्योगलाई लोक्ता फिट्ने (झोल बनाउने)उपकरण उपलब्ध गराएको छ । यसअघि जङ्गलबाट ल्याएको लोक्तालाई काठको मुङ्ग्रोले थिचेर कागज उत्पादन गरिँदै आएको थियो । 

“उपकरणको प्रयोगले कागजको मात्रा र गुणस्तर बढेको छ,” रोकाले भन्नुभयो । स्थानीय सामुदायिक वनबाट किसानले सङ्कलन गरेको लोक्ता प्रतिकिलो रु ७० मा उद्योगले खरिद गर्ने गरेको छ । सामुदायिक वनले पनि उद्योगबाट प्रतिकिलो रु पाँच शुल्क लिने गरेका छन् । गाउँलेले डुडे लेक र अल्बाङ सामुदायिक वनबाट लोक्ता सङ्कलन गर्दै आएका छन् । “बजारमा नेपाली कागजको माग अत्यधिक छ,” अर्का उद्यमी हर्कबहादुर घर्तीले भन्नुभयो । चालीस ग्रामको कागजको मूल्य रु ३० तोकिएको छ । 

बढीजसो हस्तकला व्यवसायीले कागज खरीद गर्ने गरेका छन् । उद्योगलाई थप आधुनिकीकरण गरी दिगो रुपमा सञ्चालन गर्ने उद्यमीको योजना छ । नेपाल उद्योग वाणिज्य महासङ्घको ‘एक गाउँ, एक उत्पादन’ कार्यक्रममा पनि बागलुङको हाते कागज उद्योग छनोटमा परेको थियो । (रासस)

ट्याग -  कागज उद्योग

SUGGESTED ARTICLES

img
छ सय ११ मेट्रिकटन रासायनिक मल बिक्री

कृषि सामग्री कम्पनी लिमिटेड शाखा कार्यालय पोखराबाट चालु आर्थिक वर्षको पहिलो चौमासिकमा ६११.२ मेट्रिकटन रासायनिक मल बिक्री गरेको छ । कार्यालयले यस आवका लागि विभिन्न ६० वटा सहकारीलाई सूचीकृत गरेकामा ती सहकारीमार्फत युरिया, डिएपी र पोटास बिक्री भएको कामु शाखा प्रबन्धक मुरलीमोहन रेग्मीले जानकारी दिनुभयो ।


by RSS | Nov 20

img