mobile

पहिलो गायत्री अश्वमेध महायज्ञ वीरगञ्जमा

By RSS on Feb 15,2019 - 18:23

नेपालमै पहिलोपटक गायत्री अश्वमेध महायज्ञ फागुन १९ देखि २२ गतेसम्म वीरगञ्जमा आयोजना हुने भएको छ । 

महायज्ञ आयोजना गर्न मूल आयोजक समिति गठन गरिएको छ । धर्ती र वातावरणको शुद्धिका लागि महायज्ञ गर्न लागिएको मूल आयोजक समितिका सहसंयोजक डा राजु अधिकारीले बताउनुभयो । 

‘शतपथ ब्राह्मण’ नामक ग्रन्थमा परिस्थिति र मनस्थितिलाई परिष्कृत गर्न अश्वमेध महायज्ञ गरिने उल्लेख छ । 

समितिका अध्यक्ष एवं गैर आवासीय नेपाली सङ्घका संस्थापक अध्यक्ष उपेन्द्र महतोले देशवासीलाई साहस तथा बल वृद्धि गरी राष्ट्रलाई समर्थ बनाउन महायज्ञ गर्न लागिएको जानकारी दिनुभयो । महायज्ञमा माटोको घोडा बनाएर सजाएर राखिने उहाँले सुनाउनुभयो । 

वीरगञ्ज उपमहानगरपालिकाका प्रमुख विजयकुमार सरावगीले महायज्ञमा पाँच लाख पर्यटक आउने अनुमान गरी तयारी भइरहेको बताउनुभयो । ५६ हजार ४४४ जनाले महायज्ञमा आउन अनलाइनका माध्यमबाट नाम लेखाइसकेको जानकारी पनि उहाँले दिनुभयो । 

महायज्ञमा आउने ४० देशका पर्यटकलाई होटल, लज, धर्मशाला, टेण्टसहित वीरगञ्जवासीका घर घरमा राख्ने तयारी गरिएको उपमहानगरपालिकाले जनाएको छ । 

आयोजक समितिका सहसंयोजक डा अधिकारीले नेपालमा आयोजना गरिएको पहिलो भए पनि आधुनिक कालको ४५औँ महायज्ञले नेपालीलाई अश्वशक्ति प्रदान गर्ने विश्वास व्यक्त गर्नुभयो । 

स्थानीय गाईको घिउबाट गरिने यज्ञधुम्रलाई सेवन गरी धेरै रोगबाट मुक्तिका लागि यज्ञचिकित्साको प्रयोग गरिने उहाँले बताउनुभयो । प्रशासकीय अदालतका अध्यक्ष काशीराज दाहालले इन्टरनेट र फेसबुकका कारण मानवीयता र अध्यात्म हराउन थालेकामा महायज्ञले पुनःस्थापना गर्न सहयोग गर्ने आशा गरिएको बताउनुभयो । 

विश्व कल्याणका लागि महायज्ञ सफल बनाइनुपर्नेमा उहाँले जोड दिनुभयो । महायज्ञमा एकैपटक हजारौँ ब्राह्मणले अनुष्ठान गर्ने जनाइएको छ । कार्यक्रममा सहभागिताका लागि जात तथा लिङ्गका आधारमा विभेद गरिने छैन ।  (रासस)

ट्याग -  महायज्ञ

SUGGESTED ARTICLES

img
७२ वर्षमा नागरिकता

रुकुम पश्चिमको चौरजहारी नगरपालिकाको एक महिलाले ७२ वर्षको उमेरमा नागरिकताको प्रमाणपत्र बनाउनुभएको छ । जिल्ला प्रशासन कार्यालयले नगरपालिकाको वडा नम्बर ११ स्थित टाटामा सञ्चालन गरेको शिविरमा राज्यले उपलब्ध गराउने विभिन्न सेवा सुविधाबाट बञ्चित भएपछि वडा नम्बर ६ की ढुरल्या बोहराले बल्ल ७२ वर्षको उमेरमा नागरिकताको प्रमाणपत्र बनाउनुभएको सहायक प्रमुख जिल्ला अधिकारी शेरबहादुर पुनले जानकारी दिनुभयो ।


by RSS | May 21

img