mobile

देशले शान्ति, सद्भाव, विकाससँगै नयाँ पहिचान खोजिरहेको छ : मन्त्री

By RSS on Mar 28,2019 - 17:57

सङ्घीय मामिला तथा सामान्य प्रशासनमन्त्री लालबाबु पण्डितले देशले नयाँ पहिचान खोजिरहेको बताउनुभएको छ । आज मध्यपुरथिमि नगरपालिकाको २३औँ स्थापना दिवसको उद्घाटनमा उहाँले देशले शान्ति, सद्भाव, विकाससँगै नयाँ पहिचान खोजिरहेको बताउनुभयो । 

सधैँ अरुसँग हात थाप्नुपर्ने कमजोर मुलुक कसैलाई पनि स्वीकार्य नहुने भन्दै उहाँले त्यसैले देशलाई आर्थिकरुपमा समेत मजबुद बनाउन राजनीतिक सद्भाव विकास र सहकार्य आवश्यक रहेको भनाइ राख्नुभयो । मन्त्री पण्डितले भन्नुभयो, “शान्ति, सद्भाव र एकता भएन भने देशको विकास सम्भव छैन, राजनीतिक द्वन्द्वले देश लामो समय गुज्रियो, अब पनि उसले जित्यो, मैले हारे, म केही गर्दिन, उसैले गरोस् भन्ने होइन, आफ्नो ठाउँको विकास गर्न जित्ने र हार्नेले मिलेर अगाडि बढ्नुपर्छ ।” 

कर तिर्नुपर्दा रिसाउने तर सरकारसँग लिनुपर्ने कुरामा नछाड्ने प्रवृत्ति जनतामा रहेको औँल्याउँदै मन्त्री पण्डितले भन्नुभयो, “जनतालाई करको करकरबाट टाउँको दुख्ने, तर राज्यबाट लिनुपर्ने केही नछाड्ने प्रवृत्ति छ, विकासका निम्ति कर आवश्यक छ, तर कर कति लिने निर्णय जनप्रतिनिधिले गर्ने हो, जनताको ढाड सेक्नेगरी कर लगाउनु हुन्न ।” 

कार्यक्रममा प्रतिनिधिसभा सांसद एवं पूर्वउद्योगमन्त्री महेश बस्नेतले विकासमा एकता र चुनावमा प्रतिस्पर्धा गर्नुपर्ने बताउँदै विकास र समृद्धिले भक्तपुर अगाडि बढ्ने बताउनुभयो । शान्ति, समृद्धि, उज्यालो, जाममुक्त, हराभरा, भ्रष्टाचारमुक्त भक्तपुरको अभियान सफल पार्दै विकासका हरेक पूर्वाधारबाट भक्तपुरलाई समृद्ध बनाउने बताउनुभयो । 

प्रदेश नं ३ का सदस्य डा राजेन्द्रमान श्रेष्ठ, प्रतिमा श्रेष्ठ, रजनी जोन्छे, सूर्यविनायक नगरपालिकाका प्रमुख वासुदेव थापालगायतले विकासमा ऐक्यबद्ध भएर लाग्नुपर्नेमा जोड दिनुभयो । सभापति एवं मध्यपुरथिमि नगरपालिकाका प्रमुख मदनसुन्दर श्रेष्ठले मध्यपुरथिमि नगरपालिकाले खानेपानी, सम्पदा, पुरातत्व, मठमन्दिर, पोखरी, सडकलगायतका विकासलाई प्राथमिकताका साथ अगाडि बढाएको बताउनुभयो । 

मध्यपुरथिमि नगरपालिकाका उपप्रमुख अञ्जनादेवी मधिकर्मी, प्रवक्ता राम थापामगरलगायत विभिन्न राजनीतिक दलका प्रतिनिधिले बोल्नुभएको कार्यक्रममा उत्कृष्ट करदाता, साहित्यकारलाई सम्मान गर्नुका साथै १८ जना ज्येष्ठ नागरिकको निःशुल्क स्वास्थ्य बीमा गरिएको छ ।

ट्याग -  मन्त्री पण्डित ,

SUGGESTED ARTICLES

img
सविधान संशोधन तथा लाल प्रतिवेदन सार्वजनिक होस् : राजपा

राष्ट्रिय जनता पार्टीले सर्वाेच्च अदालतका पूर्वन्यायाधीश गिरीशचन्द्र लालको अध्यक्षतामा गठित आयोगको प्रतिवेदन सार्वजनिक गर्न पुनः माग गरेको छ । प्रतिनिधिसभाको आजको बैठकको प्रारम्भमै उक्त पार्टीका नेता महेन्द्रप्रसाद यादवले सो प्रतिवेदन सार्वजनिक गर्न र संविधान संशोधनका लागि सभामुखबाट पुनः रुलिङ गर्न माग गर्नुभएको हो ।


by RSS | May 21

img