mobile

‘दुराडाँडा महोत्सव’ नयाँ वर्षमा

By RSS on Apr 10,2019 - 12:44

शैक्षिक, सामाजिक र सांस्कृतिक महत्व बोकेको लमजुङ दुराडाँडामा ‘ऐतिहासिक दुराडाँडा महोत्सव–२०७६’ हुने भएको छ ।
दुराडाँडा सेवा समाज र दुरा सेवा समाजको मुख्य आयोजनामा ऐतिहासिक, सामाजिक र सांस्कृतिक सम्पदाको संरक्षण, संवद्र्धन र प्रवद्र्धन गर्न वैशाख १ देखि ३ गतेसम्म उक्त महोत्सव गर्न लागिएको हो ।

महोत्सव समितिले मङ्गलबार यहाँ पत्रकार सम्मेलन गरी विसं २००६ मा उच्च जातिले हलो जोतेर ‘हलो क्रान्ति’ गरेको स्थान दुराडाँडामा महोत्सव गर्न लागेको जानकारी दिएको छ । दुराडाँडा सेवा समाजका अध्यक्ष इञ्जिनीयर निर्मल न्यौपानेले दुराडाँडाको ऐतिहासिक पहिचान, शान र मानलाई जीवन्त राख्न महोत्सव आयोजना गर्न लागेको जानकारी दिनुभयो । दुरा समाज नेपालका अध्यक्ष गोकुलप्रसाद दुराले दुराडाँडा क्षेत्रमा बसोबास गर्ने दुरालगायत विभिन्न जातजातिको भाषा, संस्कृति एवं स्थानीय लोककला, लोकलय, धार्मिक अनुष्ठान संरक्षण र संवद्र्धन गर्न महोत्सव आयोजना गरिएको बताउनुभयो ।

शैक्षिक क्षेत्रको महत्वपूर्णस्थलका रुपमा रहेको दुराडाँडा क्षेत्रमा कालिका मन्दिर, पुरानकोट, हलोक्रान्ति स्थल, कोटेश्वरधाम बरबोट, हेसे होइतुङ गुम्बा, मालिका देवी, सुरभी गाईफार्म, विपी उद्यानलगायतका अवलोकनस्थल रहेका छन् ।

नेपाल राष्ट्र निर्माणको शुरुआत गर्ने पृथ्वीनारायण शाहका पूर्वज यशोब्रह्म शाहलाई विसं १५५० असार १५ मा सिन्दुरेढुङ्गामा सिन्दुरजात्रा गरेर राजगद्दी गरेको ठाउँसमेत दुराडाँडामा पर्छ । दुराडाँडा क्षेत्रमा साविकको दुराडाँडा, चन्द्रेश्वर, धुसेनी, सिन्दुरे, नेटा र पुरानकोट गाउँ विकास समिति समेटिएका छन् ।

दुराडाँडाभित्र कृषि, ग्रामीण पर्यटन, पर्यापर्यटन, खेल पर्यटन, लोककला, शिक्षा, महिला सशक्तीकरणलगायतको विकासका लागि महोत्सव गर्न लागिएको समितिका उपाध्यक्ष कृष्ण अधिकारीले जानकारी दिनुभयो ।(रासस)

ट्याग -  महोत्सव ,

SUGGESTED ARTICLES

img
७२ वर्षमा नागरिकता

रुकुम पश्चिमको चौरजहारी नगरपालिकाको एक महिलाले ७२ वर्षको उमेरमा नागरिकताको प्रमाणपत्र बनाउनुभएको छ । जिल्ला प्रशासन कार्यालयले नगरपालिकाको वडा नम्बर ११ स्थित टाटामा सञ्चालन गरेको शिविरमा राज्यले उपलब्ध गराउने विभिन्न सेवा सुविधाबाट बञ्चित भएपछि वडा नम्बर ६ की ढुरल्या बोहराले बल्ल ७२ वर्षको उमेरमा नागरिकताको प्रमाणपत्र बनाउनुभएको सहायक प्रमुख जिल्ला अधिकारी शेरबहादुर पुनले जानकारी दिनुभयो ।


by RSS | May 21

img